როგორ შეარჩიოთ დამტვირთველი თქვენი ბიზნესისთვის — დიზელი თუ ელექტრო?

სასაწყობე დამტვირთველის შერჩევისას, ბიზნესი ხშირად დიზელის და ელექტრო მოდელებს შორის არჩევანის წინაშე დგას. ეს ტექნიკური დეტალია, რომელიც გავლენას ახდენს საწყობის მუშაობის პროდუქტიულობაზე, ყოველდღიურ ხარჯებსა და სამუშაო გარემოზე.

ამიტომ, კითხვა „რომელი ჯობია?“ ამ შემთხვევაში ზუსტი არ არის. სწორი მიდგომაა, გავარკვიოთ, რომელი მათგანი უფრო კარგად ერგება კონკრეტული ბიზნესის საჭიროებებს, სამუშაო პირობებსა და დასახულ ამოცანებს. ამ ბლოგში სწორედ ამ განსხვავებებსა და შერჩევის კრიტერიუმებზე ვისაუბრებთ.

დამტვირთველების სიმძლავრე და გამოყენების სფერო

დამტვირთველის სიმძლავრე და მუშაობის სტილი პირდაპირ მისი ძრავის ტიპზეა დამოკიდებული. დიზელისა და ელექტრო მოდელების სიმძლავრე იმდენად განსხვავდება, რომ თითოეული მათგანი კონკრეტული ტიპის ამოცანებისთვისაა განკუთვნილი.

დიზელის დამტვირთველი ენერგიას შიდაწვის ძრავიდან იღებს, რის გამოც მას მაღალი სიმძლავრე აქვს. შესაბამისად, ის იდეალურია მძიმე ტვირთის ასაწევად, მისაბმელების ბუქსირებისა და დახრილ ზედაპირებზე, მაგალითად პანდუსებზე გადასაადგილებლად.  მაღალი სიმძლავრის გამო, დიზელის დამტვირთველები აქტიურად გამოიყენება სამშენებლო და მძიმე მრეწველობის ობიექტებზე. 

ელექტრო დამტვირთველი, ელექტროძრავის წყალობით, სიმძლავრეს ადგილიდან დაძვრისთანავე, მყისიერად ავითარებს. ეს მას კონტროლირებად ძალას ანიჭებს და ზუსტად მანევრირების შესაძლებლობას აძლევს. ამის გამო, ოპერატორი მარტივად გადაადგილდება თაროებსა და დაბრკოლებებს შორის ისე, რომ პროდუქცია არ დაზიანდეს.  

სამუშაო გარემო და ოპერაციული პროცესები

სიმძლავრის შემდეგ, ყველაზე მნიშვნელოვანი ფაქტორი, რომელიც დიზელსა და ელექტრო დამტვირთველს შორის არჩევანზე მოქმედებს, სამუშაო გარემოა. ხშირად, სწორედ ეს კრიტერიუმი ხდება გადამწყვეტი, რადგან თითოეული მათგანი კონკრეტული სივრცისთვისაა შექმნილი.

დიზელის დამტვირთველი გარე სამუშაოებისთვისაა შექმნილი. კონსტრუქციისა და დიდი პნევმატური საბურავების დახმარებით, ის რთულ პირობებში, გრუნტიან და უხეშ ზედაპირზე ან ცუდ ამინდში ეფექტურად მუშაობს.  

სამაგიეროდ, სწორედ ამ მახასიათებლების გამო, ის რთულად ოპერირებს შენობაში. მუშაობისას გამოყოფილი გამონაბოლქვი და მაღალი ხმაური დახურულ სივრცეში საფრთხეს უქმნის თანამშრომლების ჯანმრთელობას და არღვევს უსაფრთხოების სტანდარტებს.  

ელექტრო დამტვირთველი კი დახურული სივრცისთვისაა განკუთვნილი. ის არ გამოყოფს მავნე ნივთიერებებს, ამის გამო საწყობში სუფთა ჰაერი ნარჩუნდება, თანამშრომლები კი დაკისრებულ მოვალეობებს უსაფრთხო გარემოში ასრულებენ. ამასთან ერთად, კომპაქტური ზომის გამო მარტივად გადაადგილდება შეზღუდულ სივრცეებში და არ წარმოქმნის ზედმეტ ხმაურს. 

უწყვეტი მუშაობის ფაქტორი

ოპერაციული პროცესების თვალსაზრისით, მთავარი განსხვავება მუშაობის ხანგრძლივობაშია. დიზელის დამტვირთველის საწვავით შევსებას რამდენიმე წუთი სჭირდება, რის შემდეგაც ის მზად არის, მუშაობა განაგრძოს. ამის გამო, მას უპირატესობას ანიჭებდნენ ინტენსიური სამუშაოს მქონე კომპანიები.  

სტანდარტული ტყვია-მჟავას ბატარეის მქონე ელექტრო დამტვირთველს სრული დამუხტვისთვის 6-8 საათი სჭირდება, რასაც გაგრილების პერიოდიც ემატება. ეს ფაქტორი ადრე მის შესაძლებლობებს ზღუდავდა. თუმცა, დღეს უკვე არსებობს თანამედროვე ლითიუმ-იონის ბატარეის მქონე დამტვირთველები. ისინი მოკლე დროში იმუხტება და უფრო ხანგრძლივადაც მუშაობს.  

ფინანსური მხარე გრძელვადიან პერსპექტივაში

დამტვირთველის შერჩევისას, გადაწყვეტილების მიღების საფუძველი მხოლოდ საწყისი ფასი არ უნდა იყოს. სრული ფინანსური სურათის დასანახად, აუცილებელია გავითვალისწინოთ როგორც ერთჯერადი, ისე გრძელვადიანი დანახარჯები.

დიზელის დამტვირთველის საწყისი ღირებულება უფრო დაბალია, ვიდრე მისი ელექტრო ანალოგის. ელექტრო მოდელის ფასს, ძირითადად, ძვირადღირებული ბატარეა და დამტენი მოწყობილობა ზრდის.  

ელექტროენერგია, რომელიც ელექტრო დამტვირთველის მუშაობისთვისაა საჭირო, დიზელის საწვავთან შედარებით ბევრად იაფი და, რაც მთავარია, ფასის მხრივ უფრო სტაბილურია. დიზელის ღირებულების მუდმივი ცვლილება კი ბიუჯეტის დაგეგმვას ართულებს.  

ტექნიკური მომსახურების ხარჯებში სხვაობა კიდევ უფრო თვალსაჩინოა. ელექტრო დამტვირთველს არ აქვს შიდაწვის ძრავა, გადაცემათა კოლოფი და გაგრილების სისტემა. შესაბამისად, მას ბევრად ნაკლები მოძრავი ნაწილი აქვს, რომელიც ცვდება და შეკეთებას საჭიროებს. შედეგად, მას ზეთისა და ფილტრების რეგულარული გამოცვლა არ სჭირდება, სერვისი კი უფრო იშვიათად უტარდება. 

მიუხედავად მაღალი საწყისი ფასისა, გრძელვადიან პერსპექტივაში, მაგალითად, 5 წლის ჭრილში, ელექტრო დამტვირთველი, საწვავისა და სერვისის ხარჯების ეკონომიის ხარჯზე, ჯამურად უფრო მომგებიანი შენაძენი იქნება, ვიდრე დიზელის.   

4 მთავარი კითხვა, რომელიც გადაწყვეტილების მიღებამდე უნდა დასვათ

ყოველივე ზემოთქმულის შემდეგ, დროა, ეს ინფორმაცია თქვენი ბიზნესის კონკრეტულ საჭიროებასა და სპეციფიკას მოვარგოთ. სწორი დამტვირთველის შესარჩევად საკმარისია, ამ ოთხ მთავარ კითხვას უპასუხოთ. თქვენი პასუხები თავად მიგითითებთ საუკეთესო ვარიანტზე.

სად იმუშავებს დამტვირთველი?

თუ სამუშაოების უმეტესობა შენობის გარეთ, ღია ცის ქვეშ, უსწორმასწორო ზედაპირზე სრულდება, დიზელის მოდელი უკეთესი არჩევანია. დახურული სივრცისთვის, განსაკუთრებით კი ისეთ ადგილებში, სადაც ჰაერის სისუფთავე და დაბალი ხმაური მნიშვნელოვანია, ელექტრო დამტვირთველი უალტერნატივო მოწყობილობაა.  

რა ტიპის და წონის ტვირთთან მოგიწევთ მუშაობა?

თუ საწარმოო პროცესი 5.5 ტონაზე მძიმე ტვირთის რეგულარულ გადაადგილებას მოითხოვს, დიზელის დამტვირთველი, თავისი მაღალი ტვირთამწეობით, ამ ამოცანას უკეთ გაუმკლავდება. სტანდარტული პალეტებისა და ნაკლებად მძიმე ტვირთისთვის, რომელთა წონაც ამ ზღვარს არ აღემატება, ელექტრო დამტვირთველის სიმძლავრე სავსებით საკმარისია.  

 რამდენად ინტენსიურია სამუშაო გრაფიკი?

ერთცვლიანი სამუშაო გრაფიკისთვის ორივე ტიპის დამტვირთველი მისაღებია. თუმცა, თუ თქვენი საწარმო 16 ან 24 საათიან რეჟიმში მუშაობს, არჩევანი შემდეგია: დიზელის დამტვირთველი, რომელიც რამდენიმე წუთში ივსება საწვავით ან ლითიუმ-იონის ბატარეიანი ელექტრო მოდელი, რომლის დამუხტვაც შესვენებების დროს შეიძლება.  

როგორია ფინანსური პრიორიტეტი?

თუ მთავარი ამოცანა დაბალი საწყისი ინვესტიციაა, დიზელის დამტვირთველი უფრო ხელმისაწვდომია. თუ თქვენი პრიორიტეტი გრძელვადიან პერსპექტივაში ხარჯების შემცირებაა, მაშინ ელექტრო დამტვირთველი, თავისი დაბალი საოპერაციო და სერვისის დანახარჯებით, უფრო მომგებიანი არჩევანი იქნება.   

თუ ამ კითხვებზე პასუხების შემდეგაც გიჭირთ საბოლოო გადაწყვეტილების მიღება, გახსოვდეთ, რომ სწორი ტექნიკის შერჩევაში ჩვენ, K2-ის გამოცდილი გუნდი, დაგეხმარებით. 

ინტრალოგისტიკური კომპანია K2 ტოიოტას ოფიციალური წარმომადგენელია საქართველოში და მაღალი ხარისხის დამტვირთველებთან ერთად, მომსახურების სრულ პაკეტსაც გთავაზობთ. ჩვენი გუნდი, რომელსაც ქართულ ბაზარზე მუშაობის 8 წლიანი გამოცდილება აქვს, მზად არის, დეტალური კონსულტაცია გაგიწიოთ. შევისწავლით თქვენი ბიზნესის სპეციფიკას, გავაანალიზებთ საოპერაციო პროცესებს და დაგეხმარებით ტოიოტას დამტვირთველის ზუსტად იმ მოდელის შერჩევაში, რომელიც თქვენს მოთხოვნებსა და ბიუჯეტს მოერგება.  

თუმცა, გახსოვდეთ, რომ ჩვენი პარტნიორობა ტექნიკის შეძენით არ დასრულდება. K2-ის სერტიფიცირებული სერვის-ცენტრი და პროფესიონალი ტექნიკოსები მზად არიან, ნებისმიერი გაუმართაობის შემთხვევაში სწრაფი და ხარისხიანი მომსახურება გაგიწიონ. ჩვენი მხარდაჭერის გუნდი და მობილური სერვის ჯგუფები 24/7 რეჟიმში გაგიწევენ დახმარებას. ორიგინალი სათადარიგო ნაწილების მუდმივი მარაგი კი საშუალებას გვაძლევს, შესაკეთებელი სამუშაოები უმოკლეს დროში დავასრულოთ, ამით კი საწარმოო პროცესის შეფერხების დრო და ფინანსური დანაკარგები შევამციროთ.