K2 გუნდი უკვე წლებია ეხმარება ქართულ კომპანიებს სასაწყობო და საწარმოო პროცესების გამართვაში. ჩვენი მიზანია, პარტნიორებს ხელი შევუწყოთ სივრცის სწორად ათვისებასა და სამუშაოს ეფექტურობის ზრდაში. ამ მხრივ, ერთ-ერთი ყველაზე კომპლექსური და საპასუხისმგებლო პროექტი „IDS ბორჯომი საქართველოსთან“ თანამშრომლობა გამოდგა.
„IDS ბორჯომი საქართველომ“ ყვიბისის ტერიტორიაზე ახალი, თანამედროვე ტექნოლოგიებით აღჭურვილი ჩამომსხმელი ქარხანა გახსნა. ეს პროექტი დამოუკიდებელი საქართველოს ისტორიაში, ამ სფეროში განხორციელებული ერთ-ერთი უდიდესი ინვესტიციაა. საწარმოს საერთო ფართობი 48 000 მ2-ს აღწევს. საწყის ეტაპზე მისი სიმძლავრე წელიწადში 750 მილიონი ბოთლია, სამომავლოდ კი მილიარდ ბოთლამდე გაიზრდება.
ასეთი მასშტაბის საწარმოს შეუფერხებელი მუშაობისთვის უმთავრესი იყო გამართული შიდა ლოგისტიკური სისტემის მოწყობა. ქარხანაში, სადაც პროდუქციის მოძრაობა წამითაც არ უნდა შეფერხდეს, უმაღლესი სტანდარტის შესაბამისი ინფრასტრუქტურის შექმნა იყო საჭირო. ამ ეტაპზე, უმსხვილესი ინფრასტრუქტურული სამუშაოების შესასრულებლად, პროექტში K2-ის გუნდი ჩაერთო.
ჩვენი კომპანიისთვის ეს პროექტი ინდუსტრიული კარებისა და სასაწყობე პლატფორმების დამონტაჟების თვალსაზრისით, ყველაზე მასშტაბური და რთული აღმოჩნდა. ჩვენ წინაშე იდგა მკაფიო ამოცანა: უმოკლეს დროში, სულ რაღაც 1 თვის ვადაში, დაგვემონტაჟებინა 14 დოკ ლეველერი და 17 სექციური კარი. ამ მოცულობის სამუშაოს დათქმულ დროში დასრულება რესურსების ზუსტ დაგეგმვასა და მობილიზებას მოითხოვდა, რათა ქარხნის გახსნის გეგმა არ დარღვეულიყო.
პროექტს დამატებითი ტექნიკური სირთულეც ახლდა. ბორჯომის ახალი საწარმო იმითაც არის გამორჩეული, რომ საწყობს პროდუქციის ექსპორტის გამარტივების მიზნით, პირდაპირ უკავშირდება სარკინიგზო ლიანდაგი. ეს გარემოება, მართალია, ამარტივებდა ტრანსპორტირებას, თუმცა ამავდროულად ქმნიდა არასტანდარტულ გარემოებას კარის მონტაჟის თვალსაზრისით.
ამ კომპლექსური გამოწვევის საპასუხოდ, K2-ის გუნდმა Hormann-ის არასტანდარტული, 4x5 მეტრი ზომის რულონური კარი შეარჩია და დაამონტაჟა, რომელიც სრულად მოერგო ლიანდაგის მოცულობასა და ქარხნის პარამეტრებს.
თანამშრომლობა მხოლოდ კარებისა და პლატფორმების მონტაჟით არ შემოფარგლულა. ვინაიდან ახალ საწყობში ტოიოტას 18 ერთეული დამტვირთველი მოძრაობს, დღის წესრიგში დადგა ინტენსიური შიდა უსაფრთხოების საკითხიც. ასეთ დიდ სივრცეში, სადაც ერთდროულად მუშაობს მძიმე ტექნიკა და პერსონალი, უსაფრთხოების ზომების დაცვა პრიორიტეტია.
K2-მა საწყობი, საწარმოო დანადგარები და შიდა საფეხმავლო ბილიკები სრულად აღჭურვა MPM-ის PVC დამცავებით. ამგვარად მინიმუმამდე დავიდა ინციდენტების რისკი და დაცული გახდა როგორც თანამშრომლები, ისე ძვირადღირებული ინფრასტრუქტურა.
„IDS ბორჯომი საქართველოს“ ახალი ქარხნის პროექტი K2-ის გუნდისთვის მნიშვნელოვანი გამოცდა იყო, როგორც მასშტაბის, ისე ვადებისა და ტექნიკური სირთულის მხრივ. ყველა ეტაპი დამკვეთის მკაცრი მოთხოვნებისა და გრაფიკის დაცვით წარიმართა.
ამ თანამშრომლობით K2-მა კიდევ ერთხელ დაადასტურა, რომ ფლობს საჭირო რესურსსა და პროფესიულ გამოცდილებას, უპასუხოს საქართველოს ბაზარზე ყველაზე მსხვილი კომპანიების კომპლექსურ ლოგისტიკურ საჭიროებებს.
