ბიზნესის მართვა მუდმივად გულისხმობს არჩევანს მოკლევადიან სარგებელსა და გრძელვადიან სტაბილურობას შორის. მეორადი სასაწყობე ტექნიკის შეძენა ამ დილემის ერთ-ერთი საუკეთესო მაგალითია. ერთი შეხედვით, ეს ხარჯების შემცირების გონივრული გზაა, თუმცა სინამდვილეში, გაცილებით კომპლექსური საკითხია, რადგან რისკების მართვასაც მოითხოვს.
ამ ბლოგში ჩვენ არ დავიწყებთ იმის მტკიცებას, რომ მეორად ტექნიკას ახალზე მეტი უპირატესობა აქვს. ცხადია, ეს ასე არ არის, რადგან ახალი სასაწყობე ტექნიკა ყოველთვის აღჭურვილია უახლესი ტექნოლოგიებით, არ არის გაცვეთილი და მწარმოებლის სრული გარანტიაც აქვს. ამის ნაცვლად, ჩვენი მიზანია, დაგანახოთ, თუ რა შემთხვევაში და რატომ შეიძლება გახდეს მეორადი მოწყობილობის შეძენა გამართლებული გადაწყვეტილება.
რამდენიმე მიზეზი რის გამოც მეორადი ტექნიკის შეძენა ღირს
მეორად ტექნიკას ნამდვილად აქვს ხელშესახები უპირატესობები. პირველ რიგში, ეს ფინანსური სარგებელია. საწყის ეტაპზე ის გაცილებით ნაკლებ დანახარჯს მოითხოვს. ეს ბიზნესს საშუალებას აძლევს, დაზოგილი თანხა სხვა მნიშვნელოვანი მიზნებისთვის, მაგალითად, მარაგების შესავსებად ან ახალი თანამშრომლების ასაყვანად გამოიყენოს.
მეორე დიდი უპირატესობა დროის ეკონომიაა. ბევრი ახალი დანადგარი საქართველოში ადგილზე არ იყიდება, ამიტომ მათი ჩამოტანა უცხოეთიდან, პირდაპირ მწარმოებლისაგან მოგიწევთ. ამ პროცესს შეიძლება რამდენიმე კვირა დასჭირდეს. მეორადი ანალოგი კი, როგორც წესი, უკვე ადგილზეა და მისი შეძენა დაუყოვნებლივ შეგიძლიათ.
ეს სისწრაფე გადამწყვეტია, როდესაც ბაზრის მოთხოვნა მოულოდნელად იზრდება, ან როდესაც რომელიმე დანადგარი მწყობრიდან გამოდის. ასეთ დროს კვირების განმავლობაში ლოდინი ფინანსურ ზარალსა და საწარმოო პროცესის სრულ გაჩერებას ნიშნავს. მეორადი ტექნიკის შეძენით კი კი ამ კრიზისს სწრაფად და ნაკლები დანახარჯით აგვარებთ.
მეორადი ტექნიკა იდეალური გამოსავალია, თუ დანადგარი მხოლოდ დროებით, მაგალითად, სეზონური სამუშაოებისთვის გჭირდებათ. ასეთ დროს ახალ, ძვირადღირებულ ტექნიკაში დიდი თანხის დაბანდება ფინანსურად გაუმართლებელია, რადგან წლის უმეტეს დროს ის გამოუყენებელი იქნება.
ამასთან, როდესაც დატვირთვა ნაკლებია, მცირდება ტექნიკის მწყობრიდან გამოსვლის რისკიც. იშვიათი გამოყენებისას, მოწყობილობები ნაკლებად იცვითება, რაც იმას ნიშნავს, რომ დანადგარები უფრო დიდხანს იმუშავებს გამართულად — რა თქმა უნდა, იმ პირობით, თუ მას თავიდანვე არ ჰქონდა სერიოზული ფარული დაზიანება.
ამასთან, მეორადი ტექნიკის შეძენა გარემოზე ზრუნვასაც ნიშნავს. თქვენ ხელს უწყობთ წრიულ ეკონომიკას — მოდელს, რომელიც ნარჩენების აღმოფხვრასა და არსებული მასალების, მაგალითად, ფოლადისა და რკინის, მაქსიმალურად დიდხანს გამოყენებას ისახავს მიზნად. შედეგად, მცირდება ახალი დანადგარების წარმოების საჭიროება და შესაბამისად, გარემოზე მიყენებული ზიანიც.
პოტენციური რისკები, რომლებიც მეორადი სასაწყობე ტექნიკის შეძენას ახლავს თან
მეორადი სასაწყობე ტექნიკა მხოლოდ საწყისი ფასით არ უნდა შეფასდეს. ეს ერთ-ერთი ყველაზე ხშირად დაშვებული შეცდომაა, რადგან დაბალი საწყისი ღირებულების მიუხედავად, საბოლოო დანახარჯი, დაუგეგმავი შეკეთებების, სათადარიგო ნაწილების დეფიციტის ან სხვა მიზეზის გამო, შეიძლება გაცილებით მაღალი აღმოჩნდეს.
კიდევ ერთი სერიოზული რისკია ტექნიკის უცნობი ისტორია. იშვიათია, რომ მეორად დანადგარს სრული და სანდო დოკუმენტაცია მოჰყვებოდეს. ამიტომ, თქვენ არ იცით, უწევდა თუ არა მას დასაშვებზე მეტი დატვირთვით მუშაობა, გამოიყენებოდა თუ არა მძიმე პირობებში, ან უტარდებოდა თუ არა დროული და ხარისხიანი სერვისი.
ეს რისკი განსაკუთრებით საშიშია, რადგან ზედაპირული დათვალიერებით სერიოზული დაზიანებები ხშირად არ ჩანს. მაგალითად, ახლად შეღებილ დამტვირთველს შიდა ბზარებს რთულად შეამჩნევთ, შეიძლება ვერ დაინახოთ მეორადი საპალეტე თაროს კონსტრუქციის შიდა ნაწილების კოროზია ან დაზიანებული შედუღების წერტილები.
ასეთი დაზიანების გამო, ერთი დეტალის მწყობრიდან გამოსვლამ შეიძლება დომინოს პრინციპით მთელი კონსტრუქციის ჩამოშლა გამოიწვიოს. ასეთ დროს ზარალი ბევრად დიდია, ვიდრე ერთი ნაწილის გამოცვლის ღირებულება, რადგან ზიანდება პროდუქცია, ჩერდება სამუშაო პროცესი და, რაც მთავარია, თანამშრომლების უსაფრთხოება დიდი რისკის ქვეშ დგება.
პრობლემას ქმნის თავსებადობაც. მაგალითად, პალეტის თაროების სისტემებში სხვადასხვა მწარმოებლის ნაწილები, როგორც წესი, ერთმანეთთან თავსებადი არ არის, თუნდაც გარეგნულად იდენტური ჩანდეს. ერთი ბრენდის კოჭის მეორე ბრენდის საყრდენზე დამაგრებამ შეიძლება მთელი სისტემის სიმყარე დაარღვიოს.
არანაკლებ მნიშვნელოვანია ტექნიკის მოძველების საკითხი. თქვენ შეიძლება დაზოგოთ თანხა და იყიდოთ ძველი მოდელის შესაფუთი აპარატი, მაგრამ აღმოაჩინოთ, რომ მას არ აქვს თანამედროვე საწყობის მართვის სისტემასთან დასაკავშირებლად საჭირო სენსორები და მონაცემთა გადაცემის შესაძლებლობა. შედეგად, ფლობთ დაბალ ფასად შეძენილ, მაგრამ სამუშაო პროცესიდან გამოთიშულ დანადგარს, რომელიც ავტომატიზებულ სისტემაში ვერ ინტეგრირდება.
მეორადი ტექნიკის შერჩევისას მიჰყევით რჩევებს, რომლებიც პოტენციური საფრთხეებისაგან დაგიცავთ
აღნიშნული რისკების თავიდან ასაცილებლად, პირველი და ყველაზე მნიშვნელოვანი ნაბიჯი ტექნიკის ადგილზე, დეტალურად შემოწმებაა. ეს პროცესი კვალიფიციურმა პირმა უნდა ჩაატაროს, რადგან მხოლოდ ასეა შესაძლებელი ფარული დაზიანებების აღმოჩენა. დაიმახსოვრეთ: არასდროს შეიძინოთ ტექნიკა უნახავად. თუ გამყიდველი ამაზე უარს გეუბნებათ, მაშინ მასთან თანამშრომლობას უნდა მოერიდოთ.
შემოწმებისთვის დაგჭირდებათ მარტივი, მაგრამ აუცილებელი იარაღები: საზომი ლენტი ზომების გადასამოწმებლად და კარგი ფანარი, რომელიც ბნელ კუთხეებსა და ფოლადის ზედაპირზე არსებულ ნაკლოვანებებს დაგანახებთ. მაგალითად, დამტვირთველის შემოწმებისას, ყურადღება გაამახვილეთ მის მთავარ მექანიზმებზე: შეამოწმეთ მოძრავი ნაწილების ცვეთა, დარწმუნდით, რომ ჰიდრავლიკური სისტემა გამართულად მუშაობს და სითხე არ ჟონავს.
ფიზიკური შემოწმების პარალელურად, აუცილებელია ტექნიკის სრული დოკუმენტაციის მოთხოვნა. ეს მოიცავს მომსახურების სრულ ისტორიასა და ტექნიკურ ინსტრუქციებს, რომლებიც გამოყენებისა და უსაფრთხოების წესებს მოიცავს. დოკუმენტაციის არარსებობა ან მისი წარმოდგენისგან თავის არიდება სერიოზული გამაფრთხილებელი ნიშანია და ზრდის ეჭვს, რომ ტექნიკას ფარული პრობლემები აქვს.
ყველაფერთან ერთად, დაფიქრდით იმაზეც თუ ვისგან ყიდულობთ ტექნიკას, რადგან მომწოდებლის სწორად შერჩევა რისკებს ამცირებს.
სანდო კომპანია თავად ამოწმებს ტექნიკას, გამჭვირვალედ გაწვდით ისტორიას და პასუხისმგებლობას იღებს გაყიდულ პროდუქტზე. ამის საუკეთესო დასტური კი გარანტიისა და გაყიდვის შემდგომი მომსახურების შემოთავაზებაა.
სასაწყობე ტექნიკის იჯარა - მეორადი მოწყობილობების საუკეთესო ალტერნატივა
სანამ საბოლოო გადაწყვეტილებას მიიღებთ, ღირს, განიხილოთ კიდევ ერთი ალტერნატივა — სასაწყობე ტექნიკის იჯარა. ეს განსაკუთრებით მოსახერხებელია იმ კომპანიებისთვის, რომლებსაც ტექნიკა სჭირდებათ კონკრეტული ვადით, დიდი ინვესტიციისთვის მზად არ არიან ან ფლობასთან დაკავშირებული პასუხისმგებლობების აღება არ უნდათ.
იჯარის მთავარი უპირატესობა ფინანსური მოქნილობაა. არ გიწევთ დიდი თანხის ერთიანად გადახდა და იხდით მხოლოდ ფიქსირებულ საიჯარო ქირას. ეს განსაკუთრებით ხელსაყრელია სეზონური სამუშაოების ან დროებითი პროექტებისას, როდესაც ტექნიკა მხოლოდ რამდენიმე დღით, კვირით ან თვით გესაჭიროებათ.
ყველაზე მნიშვნელოვანი კი ის არის, რომ იჯარით ტექნიკის გაცემის შემთხვევაში მოვლა-შენახვაზე, სერვისსა და შეკეთებაზე პასუხისმგებლობას ჩვენ ვიღებთ. ეს გიხსნით იმ გაუთვალისწინებელი ხარჯებისა და პრობლემებისგან, რომლებიც მეორადი ტექნიკის ფლობას ახლავს თან.
მაგალითად, ჩვენ, კომპანია k2, საქართველოში დამტვირთველების როგორც მოკლევადიან, ისე გრძელვადიან იჯარას გთავაზობთ. იჯარით შეგიძლიათ აიღოთ როგორც ახალი, ისე სერტიფიცირებული მეორადი ტექნიკა.
საბოლოო ჯამში, ახალ ტექნიკას შეიძენთ თუ მეორადს, ყველაზე მნიშვნელოვანი ის არის თუ ვისთან თანამშრომლობთ. კომპეტენტური და რეპუტაციის მქონე კომპანია თავად ატარებს სრულ დიაგნოსტიკას, გთავაზობთ შემოწმებულ და ხშირად გარანტირებულ ტექნიკას და გაწვდით სრულ ინფორმაციას მის წარსულზე.
