ტვირთვის ჩამოტვირთვის პროცესში, სატვირთო მანქანასა და დოკის პლატფორმას შორის რჩება სივრცე, რომელიც სიმაღლეების სხვაობით წარმოიქმნება. ეს კი აფერხებს ტვირთის მოძრაობას და უსაფრთხოების რისკებს აჩენს როგორც პერსონალისთვის, ისე ტექნიკისა და პროდუქციისთვის. ამ სივრცის შესავსებად და ერთგვარი ხიდის ფუნქციისათვის შექმნეს სპეციალური მოწყობილობა, სახელად დოკ ლეველერი.
რა უპირატესობები აქვს დოკ ლეველერს
დოკ ლეველერის მეშვეობით, საწყობის პლატფორმასა და სატვირთო მანქანის მისაბმელს შორის იქმნება გლუვი და სტაბილურად მყარი გადასასვლელი, რომელიც დამტვირთველის ოპერატორებს, დროის დაკარგვის გარეშე, გადაადგილების საშუალებას აძლევს. შედეგად, მცირდება თითოეული სატვირთოს დასაცლელად საჭირო დრო და პერსონალი უფრო ეფექტურად ასრულებს დაკისრებულ პასუხისმგებლობას. ამ სარგებელს კონკრეტული შემთხვევებიც ადასტურებს, მაგალითად, ერთ-ერთმა საწარმომ, რომელმაც საწყობში პნევმატური ლეველერები დანერგა, დატვირთვის ეფექტიანობის 30%-იანი ზრდა დააფიქსირა.
არანაკლებ მნიშვნელოვანია უსაფრთხოების ფაქტორი. დატვირთვის დოკი საწყობის ერთ-ერთ ყველაზე საშიშ ზონად ითვლება. ლეველერი ავსებს იმ მაღალ სივრცეს, რომელიც სამუშაო გარემოში ძალიან დიდ რისკებს ქმნის. ამით დამტვირთველის გადაყირავების, პერსონალის ჩავარდნისა და დაზიანების, პალეტების გაბზარვისა და სხვა სერიოზული ინციდენტების მოხდენის ალბათობა მცირდება. პრაქტიკა აჩვენებს, რომ ჰიდრავლიკური ლეველერებისა და უსაფრთხოების ბარიერების დანერგვამ ერთ-ერთ სადისტრიბუციო ცენტრში სამუშაო ადგილზე უბედური შემთხვევები 40%-ით შეამცირა. ამასთან, ავტომატიზებული სისტემები გამორიცხავს იმ ფიზიკურ დატვირთვას, რომელიც მექანიკური ლეველერების მართვას სჭირდება და თანამშრომლებს კუნთ-სახსროვანი სისტემის დაზიანებებისგან იცავს.
თუ დამტვირთველი არასწორ ზედაპირზე გადავა, მისი საბურავი, დაკიდების სისტემა და სხვა ძვირადღირებული კომპონენტები დაზიანდება. დოკ ლეველერი კი ტექნიკას პირვანდელ მდგომარეობას უნარჩუნებს და არ აზიანებს, ნაადრევი ცვეთისაგან იცავს და სარემონტო ხარჯებსაც ამცირებს.
როგორი ტიპის დოკ ლეველერები არსებობს?
დოკ ლეველერები ერთმანეთისგან მოქმედების პრინციპით, ავტომატიზაციის დონითა და გამოყენების სფეროთი განსხვავდება. ძირითადად, ისინი ორ დიდ ჯგუფად, დასამონტაჟებელ და სპეციალიზებულ მოდელებად იყოფა.
დასამონტაჟებელი დოკ ლეველერები
დასამონტაჟებელი ლეველერი წინასწარ მომზადებულ ბეტონის ღრმულში მონტაჟდება და მუდმივ პლატფორმას ქმნის. ამ კატეგორიაში სამი ტიპის მოწყობილობა ერთიანდება, ესენია: ჰიდრავლიკური, პნევმატური და მექანიკური.
ჰიდრავლიკური ლეველერები მაღალი დატვირთვის საწყობებში, ინტენსიური გამოყენებისათვისაა განკუთვნილი. ის ღილაკზე თითის დაჭერით აქტიურდება - ჰიდრავლიკური ტუმბო და ცილინდრები პლატფორმას ავტომატურად ზევით წევს და მის მოძრავ ნაწილს შლის. ლეველერის ეს ტიპი ყველაზე გამძლე, საიმედო და უსაფრთხოდ მიიჩნევა, რომელიც რამდენიმე ათეული ტონის სიმძიმეს უძლებს.
პნევმატური ლეველერიც ავტომატურად, ღილაკით იმართება, თუმცა ჰიდრავლიკური სითხის ნაცვლად პლატფორმის ასაწევად კომპრესორით დაბერილ ჰაერს იყენებს. იმის გამო, რომ მასში ჰიდრავლიკური სითხე არ ასხია, აქტიურად გამოიყენება სანიტარული ნორმებისადმი მგრძნობიარე ინდუსტრიებში, მაგალითად, კვების პროდუქტებისა და სასმელების საწყობებისთვის.
მექანიკური ლეველერი ყველაზე საბაზისო და იაფი ალტერნატივაა. მის ასამოქმედებლად, საწყობის თანამშრომელმა ხელით უნდა მოქაჩოს სპეციალური ჯაჭვი, რომელიც მძლავრი ზამბარების დახმარებით პლატფორმას ზემოთ აწევს. ამის შემდეგ, ოპერატორს საკუთარი ძალის გამოყენებით უწევს პლატფორმის დაბლა დაწევა და სატვირთოს ძარაზე მორგება. მართალია, ის ჰიდრავლიკურ და პნევმატურ მოდელებზე უფრო იაფი ღირს, თუმცა მას ბევრი მოძრავი ნაწილი აქვს (ზამბარები, ჯაჭვები), რომლებიც მუდმივი დატვირთვის გამო სწრაფად ცვდება და ხშირ გამოცვლას საჭიროებს.
სპეციალიზებული დოკ ლეველერები
ძირითადი, ჩასამონტაჟებელი მოდელების გარდა, არსებობს ორი ტიპის სპეციალიზებული ლეველერი, რომლებიც კონკრეტული საჭიროებებისთვის გამოიყენება.
პირველი ტიპია ვერტიკალურად შესანახი ლეველერი. მისი უნიკალურობა იმაში მდგომარეობს, რომ ის არა ჰორიზონტალურად, არამედ შენობის შიგნით, ვერტიკალურ მდგომარეობაში ინახება. ამ კონსტრუქციის წყალობით, სექციური კარი დაბრკოლებების გარეშე, სრულად იხურება და საწყობის შიგნით ჰერმეტული გარემო იქმნება. ამის გამო, ვერტიკალურად შესანახი ლეველერი გამოიყენება ტემპერატურის მკაცრი კონტროლის პირობებში, მაგალითად, მაცივარ-საწყობებში, ფარმაცევტულ და კვების მრეწველობის ობიექტებში.
მეორეა დოკის კიდის (Edge-of-Dock - EOD) ლეველერი. ეს არის კომპაქტური მოწყობილობა, რომელიც, სხვებისგან განსხვავებით, ბეტონის ღრმულში კი არ მონტაჟდება, არამედ პირდაპირ დოკის კიდეზე ინსტალირდება. ის საუკეთესო გამოსავალია მაშინ, როდესაც სივრცე ან ბიუჯეტი შეზღუდულია. EOD ლეველერი ყველაზე ეფექტიანია ისეთ ობიექტებზე, რომლებსაც ძირითადად ერთი ტიპის, სტანდარტული სიმაღლის სატრანსპორტო საშუალებები ემსახურება, რადგან მისი სამუშაო დიაპაზონი შეზღუდულია.
როგორ შეარჩიოთ დოკ ლეველერი?
სწორი ლეველერის შერჩევა მხოლოდ ერთ პარამეტრზე, მაგალითად ფასზე, სიმაღლეზე ან სიმძლავრეზე არ არის დამოკიდებული. ეს შენაძენი ურთიერთდაკავშირებული ფაქტორის ერთდროულად გათვალისწინებას მოითხოვს, მათ შორის: მომსახურე სატრანსპორტო საშუალებების ტიპებს, გამოყენებული დამტვირთველების მახასიათებლებს და თავად დოკის ფიზიკურ ზომებს. ამიტომ, გადაწყვეტილების მიღებამდე აუცილებელია რამდენიმე საკვანძო საკითხი გაითვალისწინოთ.
პირველი და უმნიშვნელოვანესი ფაქტორი საჭირო ტვირთამწეობაა. ამ პარამეტრის განსასაზღვრად უმძიმესი დამტვირთველის წონას უნდა დაუმატოთ მასზე განსათავსებელი ტვირთვის მაქსიმალური წონა. მიღებული ჯამი უნდა გამრავლდეს სპეციალურ კოეფიციენტზე, რომელიც გამოყენების ინტენსივობაზეა დამოკიდებული: ნორმალური დატვირთვისთვის (დღეში 8 სატვირთოზე ნაკლები) გამოიყენება კოეფიციენტი 2.5, ხოლო მაღალი ინტენსივობისთვის — 3-დან 4-მდე. ყოველთვის უმჯობესია შეარჩიოთ ლეველერი საჭიროზე მაღალი ტვირთამწეობით.
შემდეგ ეტაპზე გამოყენების სიხშირე და მომსახურე ტრანსპორტის ტიპები უნდა განსაზღვროთ. თუ თქვენი დოკი დღეში 8-ზე მეტ სატვირთოს ემსახურება, მაშინ მექანიკური ლეველერის განხილვა არარაციონალურია და არჩევანი უფრო გამძლე და სწრაფ ჰიდრავლიკურ ან პნევმატურ სისტემებს შორის უნდა გაკეთოთ.ამასთან, აუცილებელია იმ სატრანსპორტო საშუალებების ტიპების გათვალისწინება, რომლებიც თქვენს ობიექტზე შემოდის (სტანდარტული მისაბმელი, მაცივარი, ფურგონი და ა.შ.). სწორედ მათი სიმაღლეების მრავალფეროვნება განსაზღვრავს, თუ სიმაღლის რა დიაპაზონი უნდა ჰქონდეს ლეველერს.
გადამწყვეტი მნიშვნელობა აქვს საოპერაციო გარემოს. თუ თქვენი საწყობი განსაკუთრებულ პირობებს, მაგალითად ექსტრემალურ ტემპერატურას, მაღალ ტენიანობას ან სანიტარულ მოთხოვნებს ექვემდებარება, მაშინ ლეველერის ტიპი და მასალა განსაკუთრებული ყურადღებით უნდა შეარჩიოთ. მაგალითად, მაცივარ-საწყობისთვის საუკეთესო არჩევანი ვერტიკალურად შესანახი მოდელია, რომელიც საწყობის შიგნით სრულად ჰერმეტულ გარემოს ქმნის.
როგორ დაგეხმარებათ K2 დოკ ლეველერის შერჩევაში და რას აღმოაჩენთ ჩვენთან თქვენი საწყობის ოპტიმიზებისთვის?
როგორც ამ ბლოგიდან გამოჩნდა, დოკ ლეველერი აუმჯობესებს სასაწყობო ოპერაციების სიჩქარეს, უსაფრთხოებასა და, საბოლოო ჯამში, ფინანსურ შედეგებზე დადებითაც მოქმედებს. არასწორად შერჩეულმა მოდელმა შეიძლება გამოიწვიოს მუდმივი შეფერხებები, ტექნიკის ნაადრევი ცვეთა და, რაც ყველაზე მთავარია, შექმნას სერიოზული უსაფრთხოების რისკები თქვენი თანამშრომლებისთვის.
სწორედ ამიტომ, ასეთი მნიშვნელოვანი გადაწყვეტილების მიღებისას, თეორიულ ცოდნასთან ერთად, აუცილებელია პრაქტიკული გამოცდილების გათვალისწინება. K2-ის გუნდის მთავარი ამოცანაა, დაგეხმაროთ ამ რთულ პროცესში და თავიდან ძვირადღირებული შეცდომები აგარიდოთ.
ჩვენი გუნდი დეტალურად გაეცნობა საწყობის სპეციფიკას - რა ტიპის ტვირთი შემოდის, რა სიხშირით, როგორია გარემო პირობები და რა ტექნიკა მუშაობს დოკზე - და მხოლოდ ამის შემდეგ შემოგთავაზებთ იმ მოდელებს, რომლებიც იდეალურად მოერგება სამუშაო გარემოს.
თუ გსურთ, მიიღოთ დეტალური კონსულტაცია და იპოვოთ გამოსავალი, რომელიც თქვენს ბიზნესს რეალურ უპირატესობას მისცემს, დაგვიკავშირდით:
ვებგვერდი: K2.ge
ტელ: +995 551 07 22 22
