როგორ უნდა შეარჩიოთ საბურავები მძიმე ტექნიკისათვის - რჩევები K2-სგან

მსუბუქი ავტომობილისათვის საბურავის შერჩევისას ბრენდი, სეზონი და ფასი უნდა განსაზღვროთ. მძიმე ტექნიკის საბურავები კი სრულიად განსხვავებული კრიტერიუმებით ფასდება, მაგალითად, მნიშვნელობა ენიჭება სამუშაო პირობებს, ტექნიკის ტიპს, შესასრულებელი ამოცანების სირთულესა და ა.შ. 

გარდა იმისა, რომ K2 ევროპული ბრენდების საბურავებს გთავაზობთ, ამ ბლოგში გიზიარებთ ყველა საჭირო ინფორმაციას, რომელიც გადაწყვეტილების მიღებაში დაგეხმარებათ. 

განსაზღვრეთ რომელი ტექნიკისათვის გჭირდებათ საბურავი

არ არსებობს უნივერსალური საბურავი, ის, რაც იდეალურია ერთი მანქანისთვის, შეიძლება მეორესთვის სრულიად გამოუსადეგარი აღმოჩნდეს. ამან განაპირობა საბურავების კლასიფიკაცია ტექნიკის ტიპის მიხედვით. მაგალითად, კომპაქტური დამტვირთველის საბურავები შექმნილია უხეშ რელიეფზე სამუშაოდ. ღრმა პროტექტორი და გვერდითი დამცავები აუმჯობესებს მოჭიდებას, სტაბილურობას და ამცირებს ცვეთას.

კატოკის საბურავების შემადგენლობაში თბორეზისტენტული შენარევები შედის, რაც ტექნიკის გადაადგილებას უფრო მეტ სტაბილურობას ანიჭებს და ექსპლუატაციის დროს ცვეთასაც ამცირებს. 

ტელესკოპური დამტვირთველებისთვის სპეციალური საბურავებია განკუთვნილი, რომლებიც განსაკუთრებული გამძლეობითა და მოჭიდების უნარით გამოირჩევა. ამის გამო, ისინი გამოიყენება სამშენებლო და ინდუსტრიულ ლოკაციებზე. 

განსხვავებული ტიპის საბურავი სჭირდება ფრონტალურ დამტვირთველს. ამ შემთხვევაში განკუთვნილია სპეციალური, მაღალი დატვირთვისათვის შესაბამისი მოდელები. საბურავებს აქვს გასკდომის მიმართ რეზისტენტული შემადგენლობა და კარგი მოჭიდება. ამიტომ, მძიმე პირობებშიც კი შეუფერხებელი მუშაობის საშუალებას იძლევა.

გრეიდერის საბურავებს, რომელთა შეძენასაც, ყველა სხვა ტიპთან ერთად, K2-ში შეძლებთ, თვითწმენდი პროტექტორები აქვს. ამრიგად, ამ საბურავებით ტექნიკა ტალახიან ზედაპირსაც კი კარგად ეჭიდება და უსაფრთხოდ გადაადგილდება.  

ესაკვატორებისთვის შექმნილია საბურავები, რომლებიც მძიმე გათხრით სამუშაოებს წარმატებით გაუმკლავდება. თვითმწმენდი პროტექტორების წყალობით, ის ეფექტურია ტალახიან ზედაპირებზეც.

რაც შეეხება ტრაქტორის საბურავებს, ისინი გამძლეობითა და მაღალი ხარისხის მოჭიდებით გამოირჩევა. იდეალურად ერგება როგორც სასოფლო-სამეურნეო სამუშაოებს, ისე მძიმე ინდუსტრიულ გარემოს.

დაფიქრდით, რადიალური საბურავი გჭირდებათ თუ დიაგონალური?

ყველაზე მნიშვნელოვანია გადაწყვიტოთ რადიალური საბურავი გჭირდებათ თუ დიაგონალური. დიაგონალური საბურავები ტრადიციული ტექნოლოგიით მზადდება, სადაც კორდის ფენები ერთმანეთზე დიაგონალურად არის განლაგებული, რაც მტკიცე გვერდით კედელს —  საბურავის ის ნაწილი, რომელიც პროტექტორსა (ნაწილი, რომელიც გზას ეხება) და დისკს შორის მდებარეობს — ქმნის. ასეთი კონსტრუქცია იდეალურია დაბალსიჩქარიანი სამუშაოების შესასრულებლად, იქ, სადაც მაღალია გვერდითი კედლის დაზიანების რისკი, მაგალითად, კლდოვან კარიერებში მომუშავე დამტვირთველებისთვის.

მეორე მხრივ, რადიალური საბურავები თანამედროვე და ტექნოლოგიური თვალსაზრისით განსხვავებულად დამზადებული ალტერნატივაა. ამ ტიპის საბურავს აქვს ე.წ. კარკასი, რომელიც 90 გრადუსიანი კუთხით განლაგებული ფოლადის კორდებისგან შედგება. ამგვარი სტრუქტურის წყალობით, გვერდითი კედელი და პროექტორი ერთმანეთისაგან დამოუკიდებლად მოძრაობს. შედეგად, რადიალური საბურავი ხახუნის არ არსებობის გამო ნაკლებ სითბოს გამოიმუშავებს და განკუთვნილია მაღალი სიჩქარითა და გრძელ მანძილებზე მომუშავე ტექნიკისთვის.

შეაფასეთ სამუშაო გარემოში არსებული რისკები: გჭირდებათ თუ არა პუნქციისგან სრული დაცვა?

არსებობს სამუშაო გარემო, სადაც საბურავის გახვრეტის რისკი იმდენად მაღალია, რომ სტანდარტული, ჰაერით სავსე (პნევმატური) საბურავები არაპრაქტიკულია. ასეთი შემთხვევებისთვის ორი ძირითადი ალტერნატივა არსებობს. პირველი — მთლიანი (Solid) საბურავები, რომლებიც მყარი რეზინისგან მზადდება და ჰაერს არ შეიცავს. ეს საბურავები იდეალურია რთული და დაბრკოლებებით სავსე გარემოში გამოსაყენებლად, მაგალითად, სამშენებლო ობიექტებზე, სადაც დიდი რაოდენობით ნარჩენები, მათ შორის მეტალი, ყრია ძირს. 

მეორე ალტერნატივაა ქაფით შევსებული საბურავები. ეს საბურავები ჰაერის ნაცვლად, პოლიურეთანის ქაფით ივსება, რაც მას გახვრეტისაგან იცავს. ის უფრო მძიმე და გამძლეა, ვიდრე ჰაერით სავსე საბურავი, მაგრამ უფრო პრაქტიკულად გამოსაყენებელია, ვიდრე მთლიანად რეზინის მოდელი.  თუმცა, აუცილებლად უნდა აღინიშნოს, რომ ამ ტიპის საბურავი მაინც დაზიანების რისკის ქვეშაა, განსაკუთრებით გვერდითი კედლების თვალსაზრისით. თუ საბურავი გაიხვრიტება ან გაიხევა, ქაფი გამოიჟონება და საბურავი დეფორმირდება. 

საბურავის შეძენამდე აუცილებლად წაიკითხეთ მასზე დატანილი ინფორმაცია 

საბურავის სწორად შერჩევისთვის აუცილებელია მის გვერდით კედელზე დატანილი კოდირებული ინფორმაციის წაკითხვა. ეს არის ერთგვარი მარკირება, რომელიც მის ყველა ძირითად მახასიათებელს მოიცავს. 

ძირითადი ინფორმაცია, რასაც ყურადღება უნდა მიაქციოთ, არის ზომა, დატვირთვისა და სიჩქარის ინდექსები და TRA კოდი. მაგალითად, თუ საბურავზე დატანილია მარკირება 26.5R25, ეს ნიშნავს, რომ მისი სიგანე 26.5 ინჩია, „R“ მიუთითებს რადიალურ კონსტრუქციაზე, ხოლო „25“ — დისკის დიამეტრს ინჩებში. დატვირთვისა და სიჩქარის ინდექსები კი აჩვენებს იმ მაქსიმალურ წონასა და სიჩქარეს, რომელზეც საბურავს უსაფრთხოდ შეუძლია მუშაობა.

განსაკუთრებით მნიშვნელოვანია TRA კოდის გაგება. ეს კოდი საბურავის გამოყენების სფეროს განსაზღვრავს. ასო ტექნიკის ტიპზე (E – მიწისმთხრელი, L – დამტვირთავი, G – გრეიდერი) მიუთითებს, ციფრი — პროტექტორის ტიპსა და სიღრმეზე. მაგალითად, L-5 კოდი ნიშნავს, რომ საბურავი განკუთვნილია დამტვირთავისთვის და აქვს ექსტრა ღრმა პროტექტორი. 

სანამ საბოლოო არჩევანს გააკეთებთ, უპასუხეთ კითხვებს

იმისათვის, რომ ამ ბლოგში განხილული ყველა ძირითადი ფაქტორი გაითვალისწინოთ და სწორი გადაწყვეტილება მიიღოთ, საბოლოო გადაწყვეტილებამდე ქვემოთ მოცემულ შეკითხვებს მოკლედ უპასუხეთ:

• ტექნიკის ტიპი: რა ტიპის მოწყობილობისთვის არჩევთ საბურავს?

• სამუშაო ციკლი: რა მანძილზე და რა საშუალო სიჩქარით იმუშავებს ტექნიკა?

• გარემოს რისკები: რამდენად მაღალია საბურავის გახვრეტის ან დაზიანების რისკი?

• სამუშაო ზედაპირი: რა არის ძირითადი სამუშაო ზედაპირი — კლდე, ტალახი, ქვიშა თუ ასფალტი?

• დატვირთვის კონტროლი: შეესაბამება თუ არა საბურავის დატვირთვის ინდექსი თქვენი ტექნიკის მაქსიმალურ წონას?

თუმცა, თუ გსურთ, ეს პროცესი კიდევ უფრო გაიმარტივოთ, საქმე პროფესიონალებს უნდა მიანდოთ. სწორი საბურავის შერჩევა მხოლოდ ტექნიკური მახასიათებლების ცოდნას არ გულისხმობს, რადგან მნიშვნელოვანია ამ ცოდნის სწორად გამოყენება თქვენი კონკრეტული ამოცანების, ტექნიკისა და სამუშაო გარემოს გათვალისწინებით.

სწორედ ამაში დაგეხმარებათ K2 სასაწყობე ტექნიკა, რომელიც საქართველოში ორ წამყვან საბურავების ვროპულ ბრენდს წარმოადგენს, ესენია: BKT და MARANGONI. 

ჩვენი გამოცდილი გუნდი გთავაზობთ არა მხოლოდ მაღალი ხარისხის პროდუქტს, არამედ სრულ საკონსულტაციო მომსახურებას. სპეციალისტები დეტალურად შეისწავლიან თქვენი ტექნიკისა და სამუშაო გარემოს თავისებურებებს და შეგარჩევინებენ საბურავს, რომელიც თქვენი ბიზნესის საჭიროებებს სრულად მოერგება.